Juliet Karmakar Mondol

Fel gweithiwr yn Sefydliad Technoleg India, Kharagpur, fy mhrif nod yw darparu cefnogaeth iechyd meddwl gadarn i'r myfyrwyr sy'n dilyn cyrsiau mewn Peirianneg. Gall pontio o amgylchedd strwythuredig yr ysgol i ffordd fwy annibynnol y coleg fod yn heriol, ac mae’n hanfodol ein bod yn deall y pwysau unigryw y mae myfyrwyr yn eu hwynebu yn ystod y cyfnod allweddol hwn. Mae fy swydd yn eu helpu i lywio'r rhwystrau hyn gyda gwytnwch.

Oherwydd fy mhrofiad dros y blynyddoedd, rydw i wedi meithrin dealltwriaeth ddyfnach o'r anawsterau y mae oedolion ifanc yn eu hwynebu heddiw. Mae fy ymrwymiad i'r daith hon wedi'i seilio ar y gred y gall myfyrwyr, gyda'r gefnogaeth gywir, ddysgu sut i reoli eu llesiant meddyliol a chofleidio eu hymgais academaidd gyda hyder ac eglurder.

Er fy mod yn raddol gwella fy null o ymgysylltu â’r myfyrwyr yn Sefydliad Technoleg India, roeddwn yn teimlo bod rhywbeth hanfodol ar goll o hyd, felly dewisais astudio'r MSc mewn Dadansoddi Ymddygiad Cymhwysol (ABA) ym Mhrifysgol Bangor. Agorodd y penderfyniad hwn orwelion newydd i mi. O'r eiliad cyntaf i mi ymgeisio hyd at y diwrnod y graddiais, profais dwf sylweddol - nid yn unig yn fy mywyd personol, ond hefyd yn y ffordd rwy'n gweld heriau addysgol. Hoffwn hefyd bwysleisio fy niolchgarwch i'm haddysg flaenorol, a oedd wedi gosod sylfaen gref i adeiladu profiadau cyfoethocach o ddysgu trawsfudol arni. Roedd yn fy helpu i ddeall sut y gellir defnyddio darganfyddiadau gwyddonol er budd iechyd a llesiant y cyhoedd, sy’n rhywbeth rydw i wedi bod yn ymwneud ag ef wrth rymuso cymuned y campws preswyl i ddarparu cefnogaeth gymdeithasol ehangach, iechyd ataliol ac i gysylltu â phobl.

Roedd yr MSc mewn Dadansoddi Ymddygiad Cymhwysol yn cynnwys project mewn ysbyty GIG a oedd yn agoriad llygad mawr ac yn brofiad a oedd yn pwysleisio pwysigrwydd cymhwyso damcaniaeth i ymarfer yn y byd go iawn. Cafodd y profiad hwn effaith gadarnhaol ar fy sgiliau triniaeth, a gallaf nawr gynorthwyo fy myfyrwyr i reoli eu meddyliau llethol trwy nodi'r newidiadau angenrheidiol ac addasu atebion. Un o'r therapïau allweddol a gafodd argraff arnaf yn ystod y cwrs hefyd oedd Therapi Derbyn ac Ymrwymo (ACT), sy’n eirioli dros y cysyniad o dderbyn yn hytrach nag ymladd brwydr feddyliol gyson.

Sylweddolais bod byw yng Nghymru yn peri sawl her, a bu’n rhaid i mi addasu i ddiwylliant a fframwaith addysgol gwahanol a dysgu'r sgiliau angenrheidiol i reoli fy astudiaethau, dynameg teuluol, ac ailddyfeisio personol. Roedd fy mhrofiad yng Nghanolfan Ragoriaeth Ymwybyddiaeth Ofalgar Prifysgol Bangor yn rhan hanfodol wrth fy helpu i lywio'r teimladau hyn, ac rwy'n teimlo bod fy mhrofiad ym Mhrifysgol Bangor wedi fy ngrymuso ac wedi cyfoethogi fy nhwf personol yn sylweddol. Drwy ymarferion ymwybyddiaeth ofalgar, rydw i wedi datblygu cysylltiad dyfnach â mi fy hun ac wedi dod i ddeall bod fy meddyliau yn aml yn rhwystro fy ngallu i gysylltu â phobl eraill. Mae ymwybyddiaeth ofalgar wedi peri i mi sylweddoli bod fy mhryder o gael fy marnu yn cyfyngu ar fy rhyngweithiadau cymdeithasol. O'r sylweddoliad hwn, yn hytrach na meddwl am fy nheimladau fel gwendidau neu fethiannau, rydw i wedi mabwysiadu meddylfryd adeiladol sy’n canolbwyntio ar ddefnyddioldeb posibl. Mae’r newid hwn wedi fy ngalluogi i werthfawrogi fy swydd ac ymdrin â fy natblygiad proffesiynol gyda meddylfryd rhagweithiol ac agored.

Ers dychwelyd i India, rydw i wedi bod yn ddigon ffodus i ddod yn Llysgennad Breuddwydion y Byd ar gyfer 'Breuddwydion yn India', sydd wedi rhoi'r cyfle i mi gymryd rhan mewn mentrau creadigol sydd â'r nod o feithrin datblygiad myfyrwyr, trwy ganolbwyntio ar drawsnewid meddyliau yn ganlyniadau ymarferol a gweithredu ysgogiadau strategol o fewn y sefydliad. 

Mae dadansoddi ymddygiad yn annog archwiliad beirniadol o swyddogaethau ymddygiadau penodol. Yn unol â hyn, rwy'n addysgu fy myfyrwyr ar agweddau swyddogaethol ymddygiad a chynhaliaeth ymddygiad, ac mae fy astudiaethau ym Mhrifysgol Bangor wedi fy helpu'n fawr o ran mireinio fy sgiliau. Rwy'n falch iawn bod fy ngwaith wedi cyfrannu at gael fy enwi fel derbynnydd Gwobr Rhagoriaeth Staff yn 2022 a 2025.

Rwy'n hynod falch o fy nghyflawniadau a’r ffaith bod fy ngwaith yn helpu pobl eraill. Mae fy nyled i Brifysgol Bangor yn fawr am ganolbwyntio fy meddwl a rhoi profiad hanfodol i mi yn y maes hwn sy’n datblygu.