Graddau Cymdeithaseg Israddedig

Ym Mangor, mae astudio Cymdeithaseg yn ymwneud â gwneud gwahaniaeth. Mae ein gradd yn rhoi cyfiawnder cymdeithasol wrth ei gwraidd; byddi di’n archwilio sut mae ymatebion i anghydraddoldebau ac argyfyngau yn digwydd ym mywyd bob dydd a sut maent yn cael eu llunio gan rymoedd byd-eang. Byddi di’n cysylltu heriau lleol â materion byd-eang, gan gynnwys mudo, newid yn yr hinsawdd, deallusrwydd artiffisial a thechnolegau digidol, hawliau dynol rhyngwladol, ac anghydraddoldeb economaidd byd-eang. Trwy gydol dy radd, byddi di’n dysgu sut mae polisïau'n cael eu creu, eu herio a'u trawsnewid, a sut mae cymunedau'n gweithio tuag at atebion tecach.

Datblyga sgiliau ymchwil ymarferol y mae gwyddonwyr cymdeithasol yn eu defnyddio i ddeall ac ymdrin â materion y byd go iawn. Byddi di'n dysgu sut i gynnal cyfweliadau ansoddol, dylunio arolygon, dadansoddi data, gwneud ymchwil digidol ac ymchwil ar-lein, a gwneud gwaith maes yn y gymuned. Hefyd, cei’r cyfle i fynd â dy brofiad ymhellach trwy ein cynllun interniaethau.

Archwilia sut mae tystiolaeth yn llunio polisi, sut mae gweithredu cymdeithasol yn gweithio, a sut mae ymchwil yn sbarduno newid. Byddi di’n meithrin y sgiliau i ddylunio, gwerthuso ac eiriol dros atebion i heriau cymdeithasol mwyaf dybryd heddiw – gan droi dy syniadau yn weithredu.

Tyrd â dy astudiaethau'n fyw drwy ddefnyddio’r hyn rwyt wedi ei ddysgu mewn lleoliadau byd go iawn megis projectau cymunedol, partneriaethau â sefydliadau, a chyfleoedd i weithio gyda llywodraeth leol, cyrff anllywodraethol, y cyfryngau, asiantaethau cyfiawnder troseddol, a chyrff cyhoeddus ehangach. Rydym yn cynnig cyfleoedd ar gyfer lleoliadau gwaith gydag awdurdodau lleol a sefydliadau cymunedol, gan sicrhau bod dy ddysgu wedi ei gysylltu'n uniongyrchol â phrofiad proffesiynol. Bydd teithiau maes i lywodraeth leol a chenedlaethol ac archwiliadau o faterion cyfoes, megis dirywiad y stryd fawr, yn dod â pholisi ac ymarfer yn fyw. Mae ein rhaglenni gradd wedi eu cynllunio i ganolbwyntio ar yrfaoedd, gan dy baratoi ar gyfer amrywiaeth eang o gyfleoedd proffesiynol.

Astudia gydag academyddion agos-atoch ac uchel eu parch yn rhyngwladol y mae eu hymchwil yn cwmpasu anghydraddoldebau cymdeithasol, ymgyrchedd a hawliau, deallusrwydd artiffisial a'r gymdeithas ddigidol, tlodi, gwleidyddiaeth hunaniaeth, newid yn yr hinsawdd, cymunedau, lles, trosedd a chyfiawnder, llesiant, a newid cymdeithasol. Byddi di’n dysgu mewn amgylchedd cyfeillgar a chefnogol gan bobl sy'n llunio dadleuon ac yn dylanwadu ar bolisi yn y byd go iawn.