Canolfan Ymchwil ac Ymarfer Meddylgarwch

Ystyr ymwybyddiaeth ofalgar ydi dwyn ein sylw yn fwriadol at y foment bresennol, fel y mae, heb geisio ei newid na'i farnu. Mae'n sylwi ar feddyliau, emosiynau, teimladau'r corff, a'r amgylchoedd gyda chwilfrydedd a charedigrwydd. Yn hytrach na chael ein dal mewn pryderon am yfory neu edifeirwch am ddoe, mae ymwybyddiaeth ofalgar yn ein helpu i aros yn gysylltiedig efo'r hyn sy'n digwydd ar hyn o bryd.

Dydi hyn ddim yn golygu gwagio'r meddwl na chyflawni rhyw gyflwr arbennig. Yn syml, mae’n golygu dod yn fwy ymwybodol o brofiad uniongyrchol a bod yn agored i’r profiad hwnnw, yn amyneddgar efo’r profiad a’i dderbyn.

Dydi ymwybyddiaeth ofalgar ddim yn dalent arbennig sydd gan rai pobl a ddim gan eraill. Mae'n allu naturiol sydd ar gael i bob un ohonom - yn un y gallwn ni ei gryfhau trwy ymarfer. 
Trwy fyfyrdod, rydan ni’n hyfforddi ein sylw'n raddol i aros efo'r foment bresennol. Dros amser, mae'r ymarfer hwn yn cryfhau ein gallu o ran ymwybyddiaeth ofalgar, fel bod modd i ni ei gynnwys ym mhob agwedd ar ein bywydau beunyddiol.